Po bëhen afro 24 orë që nga aksidenti i dy pjesëtarëve të Policisë së Kosovës, që përfundoj edhe me zhdukjen e tyre.

Aksidenti i rëndë në magjistralen Kaçanik-Hani i Elezit ndodhi rreth orës 21:00 ku vetura e pjesëtarëve të Policisë së Kosovës përfundoj në lumin Lepenc.

Ndërkohë Indeksonline ka kontaktuar zëdhënësin e policisë për rajonin e Ferizajt, Agim Gashi i cili ka deklaruar se nuk ka ende ndonjë të re lidhur me dy pjesëtarët e policisë.

“Ju informoj se kërkimi është duke vazhduar nga ana e të gjithë njësive si dhe FSK-së por deri më tani nuk ka diçka të re”, ka thënë Gashi.

Për kërkimin e policëve, Malsor Dashi dhe Armend Trena janë funksionalizuar pjesëtarë të shumtë të Policisë së Kosovës si dhe të Forcës së Sigurisë së Kosovës. Përpos tyre në kërkimin e dy pjesëtarëve tashmë të zhdukur të policisë janë angazhuar edhe KFOR-i, të cilët sot kanë qëndruar mbi lumin Lepenc dhe hapësirën e afërt me helikopterë të shumtë.

Kërkim për Dashin dhe Trenan kanë vazhduar edhe në zonën maqedonase. Madje është pikërisht i pari i komunës së Hani Elezit, Refki Suma i cili pak më parë ka deklaruar se FSK nuk mund të dalë në territorin e Maqedonisë pa lejen e autoriteteve maqedone por që policia maqedonase dhe ajo kosovare janë në bashkëpunim e sipër për kontrolle dhe se patrullojnë pesë kilometra në territore respektove.

Për kërkimin e dy pjesëtarëve të FSK-së janë vënë në ndihmë edhe qytetarë të shumtë, përpos zhytësve të institucioneve të sigurisë kosovare.